"Marunnuzza, staju murènnu, prestu, vàsimi!
Lu me cori sbattulìa 'mpazzùtu,
e si nun voi ca vaju a lu tabbùtu,
stènnimi li to vrazziceddi e tra iddi 'ncàsimi.
Ti offru la me vita, Marunnuzza, spùsimi!
Lu dicu cu l'ardùri chiù sinceru,
t'amu, e si tu m'ami pi davèru,
strìncimi forti e a lu to ciancu cùsimi!".
"Cu 'sta farsa, va', finèmula,
pirchì lu cori miu nun la supporta;
si tu mi 'nganni, megghiu farla morta
ca viva e dispirata, va', chiurèmola!
'Sta discussioni a loncu nun purtàmola
si nun è vera e mi voi dari peni;
ma si tu m'ami dimmi, unicu beni:
pi tia chi sugnu?..."
"Pi mia di li riggìni sì riggìna,
pirchì lu to surrisu dilicatu
cumanna a lu me cori 'nnammuratu
e 'nta li stiddi m'isa e mi strascina.
La vuci to mi lassa stralunatu;
la manu to l'arma m'incatìna;
li vavareddi to su' cosa fina
e la to vucca zuccuru filatu.
Forsi sì sulu 'n sonnu? 'Na visioni?
Ma puru si tu fussi 'na chimera,
non resistissi a la to tintazioni.
'Nvèci sì vera, si, sì propriu vera,
e lu me cori svampa di passioni,
pirchì unni passi tu c'è primavera!.
Pi mia tu sì 'n àncilu di celu
vinutu 'n terra pi mi frasturnari;
davanti a 'st'occhi tò priziusi e rari
m'arrennu e lu me amuri ti rivelu.
Ju sugnu nu stelu e tu lu ciùri,
ju ti sustènnu e tu mi fai campàri.
Ju sugnu pisci e tu sì lu me mari.
Lu cori miu vulisti
e iddu a tia lu stennu".
Davanti a 'sta vuccuzza tutta meli
e a 'sti to guanci russu-purpurìnu,
canto l'amuri e s'aprunu li celi.
GrilloParlante