Guarda ca chistu munno è assaie curiuso
nun saccio, mo, si tu ce maie penzato
a me, ca tengo ‘o core nzamarrato
spisso succede quanno stó nguttuso.

Tu nzierre ll’uocchie e suonne cose belle:
l’ammore, ammice, ‘e sorde, la recchezza;
te scite e t’arritruove chê ttorzelle
e co li mmane chiene de mmunnezza.

Uno se nzora pe n’avé nu figlio
ma nun ne pote avé...pe qua’ fattura?
n’ato po’ ll’ave senza nu cunziglio
e ‘o va iettanno dint’ â spazzatura…

Te ncuntre cu na femmena assaie bella
‘a vuó, t’ ‘a spuzzulie, te n’annammure;
nun campe cchiù, pe chella te ne muore
ma chella a n’ato appiccia ‘a furnacella.

Overamente ca stu munno nuosto
è chino ‘e fatte stramme l’hê ’a sapè,
ma nuie nun ce penzammo meh, oi né
ascimmo a chistu mpuosto.