E ti te trovi drento a 'sto silenzio
cussì de colpo che gnànca ti te inacòrzi,
'lora ti te senti intortigià, invis'cià, ingarbugià,
sborìo, parchè ela la zé cussì bela, scamofiòsa,
santa, bagàssa, ladra, slòdra, diavolessa,
la te sbàte in tel muso tanta de quela belèzza
che se a volte la par soràda la te ciàpa
par le cane de la gola, la te fa mancàr el fià,
colpi al cuor come che fusse el primo Amor...
La te s'ciafìsa, slèpe, pastèchi fin a farte i oci
tuti macài e l'ànema scomìnzia a desfàrse
cofà 'na sculieràda de miel, el sarvèli
te va in papa squasi da sentìrte mal...
Maledèta, malignàza, càncara,
che ti te tol bàgia de i me sentimenti,
che ti te làssi tocàr, tamussàr, palpugnàr,
co le colonète, i passaman cussì lustri
tanto da parèr verò bufà de Muran, oro fin,
in lastra, massìzzo, e ti me resti inpegolàda
su la polpa de i dèi, 'lora mi te pìzzego,
te toco, te sfiòro, te carèzzo, te dàgo frignòcole,
te mèto le man 'dosso, slargo i bràzzi tanto
che rièsso a tocàr i do muri de la càle,
te toco le pière rozegàe da'l Tenpo,
gràto le to malte che se desfarìna, te zàpego,
alzo le man fin a tocàr el sofìto de'l sotopòrtego,
verzo i brazzi par sìnger la vera da pozzo
e dopo cofà putèo ghe bàto sora come tanbùro,
serco de carezzàr quela gata in Amor
che se ruzza 'torno a la fontàna che cròcola...
Dio come che ti me ga redùto
ma so cussì contento de 'sta scùfia,
de 'sto rebaltamento,
de 'sto novo Amor,
mato, strànbo, fora de'l vàda, 'nosènte, pecaminòso...
GRAZIE VENEZIA MIA!.


E ti ritrovi dentro a questo silenzio
così di colpo che nemmeno te ne accorgi,
allora ti senti avvolto, invischiato, confuso,
sbalestrato perchè lei e così bella, leziosa,
santa, puttana, ladra, sudiciona, diavolessa,
ti sbatte sul viso tanta di quella bellezza
che se a volte sembra spensierata ti prende
per la strozza, ti fa mancare il fiato,
colpi al cuore come fosse il primo Amore...
Ti schiaffeggia, sberle, ceffoni fino a farti
gli occhi tutti pesti e l'anima comincia a sciogliersi
come cucchiaiata di miele, il cervello
si spappola quasi da sentirti male...
Maledetta, maliziosa, meravigliosa.
che ti burli dei miei sentimenti,
che ti lasci toccare, palpeggiare, brancicare,
con le colonnette, balaustre così lucenti
tanto da sembrare vetro soffiato di Murano,
di oro fino, in lastra, massiccio, mi resti appiccicata
sui polpastrelli, allora ti pizzico,
ti tocco, ti sfioro, ti accarezzo, ti do buffetti,
ti metto le mani addosso, slargo le braccia
tanto che riesco a toccare i due muri della calle,
ti tocco le pietre rosicchiate dal Tempo, gratto via
le malte che sfarinano, ti calpesto, alzo le mani
fino a toccare il soffitto del sottoportico,
allargo le braccia per cingere la spalletta del pozzo
e dopo come bimbo ci batto sopra come tamburo,
cerco di accarezzare quella gatta in Amore
che si struscia attorno alla fontana gorgogliante...
Dio, come mi hai ridotto, ma sono contento
di questa sbornia, di questo sconvolgimento,
di questo nuovo AMORE,
matto, avventato, fuori ragione, innocente, peccaminoso:
GRAZIE VENEZIA MIA!.