Schezzecheja
nu cielo annubato e niro
mena acqua suttile.
Nanz’ ‘e lastre appannate
i’ guardo foro appucundruto
e veco ca nun schiove!
Stu juorno malato
e ca nun scarfa preta
lento se consuma
senza nu raggio ‘e sole;.
‘o core, a curto ‘e parole,
ammuine nun sape fà,
umbrato e zitto se ne stà!
Mo ‘o cielo se fa chiù cupo
luntano lampeje;
nu remmore surdo,
quase nu lamiento,
p’ ’e nuvole cammina
e fa paura!
Vularrià ca fosse estate
ncopp’ô balcone n’ata vota
vedè panne spase,
vedè nu cielo
tutt’azzurro comm’o mare,
manneche 'e ncammisa
alleccarme nu gelato
senza panne
chiù friddo ‘e sti vetrate.
Bello o malamente,
comm’a vita, ‘o tiempo
sempe corre senza sciate,
capricciuso cagne
senza addumannà nient’a nisciuno,
assulato o scuro, chella ca ce dà
accussì ce l’avimmo piglià!