Gennaro guarda 'o mare
e s'annammora e chesta ggente
m'ancora nun se 'mpara
a nun fidarse d''e fetiente,

e parla, core 'mmane
'e carità e ammore
ch'è l'unica salvezza
primma ca uno more.

Gennaro nun s'annasconne
e nun tene appaura,
'a morte è comme 'o suonno
sulo pe'poco è scuro

pecchè t'arape 'e pporte,
'e pporte e 'n ata vita
chella ca nun tene tiempo
ch'è gioia infinita.

Gennaro perde 'a capa
m''a perde overamente,
Gennaro jett''o sango
e salva tanta ggente.

'na storia ch'è overa
o è sulo fantasia,
io chesto nun 'o ssaccio,
è storia 'e mmiez''a via.

Però ce sta 'na preta
e pure 'n ampollina
cu 'o sango e 'stu Gennaro
ca crea 'n ammuina,

'a ggente che ce crede
è chella senza scienza,
ca tene fede a Dio
e sempe 'na speranza

ca 'o Santo e 'o Pataterno
muvenno a cumpassione
mannassero nu terno
pe chesta devozione.

Traduzione-------------
Gennaro guarda il mare e s'innamora di questa gente
Ma ancora non impara a non fidarsi dei cattivi.
E parla, cuore in mano, di carità e amore
Che è l'unica salvezza prima della morte.
Gennaro non si nasconde e non ha paura,
la morte è come il sonno, solo per un po'
è buio, perché ti apre le porte di una nuova
vita, quella senza tempo ch'è gioia infinita.
Gennaro perde la testa, ma la perde per davvero,
Gennaro muore, ma salva tanta gente.
Una storia vera o solo fantasia? Questo non lo so,
è storia di strada. Però c'è una pietra ed anche
un'ampollina con il sangue di questo Gennaro
che crea discussione, la gente che ha fede
è quella senza scienza, che crede in Dio
e ha sempre una speranza: che il Santo e
il Padreterno, muovendo a compassione
mandassero un terno per questa devozione.