L’Urdemo Futuro

Arapette ‘a porta chiano
pe vedé ‘e che se trattava.
Penzaje e po’ dicette:”E’strano!”
Tutta sta ggente che pregava….

‘E ffemmene ‘o Rusario mmieze ‘e mmane,
‘e viecchie assunnate ncoppa ‘e mmure, ,
‘na criatura cu ‘nu piezzo ‘e pane
e ‘na figliola ‘e renza dint’ ‘o scuro.

Trasette. E all’intrasatto a porta se chiurette.
Me giraje pe’ turnà arrete.
A morta!! A vedette,
me stennette a mano,
scanzaje ‘na preta e a seguette chianu chiano.


Me purtaje ‘ncoppo a ‘nu balcone.
“Guarda!” E m’affacciaje..
Mammema cu pateme, sott’a ‘nu purtone
chiagneno,s’abbracciano,
me fanno pena assaje

Po’ esce ‘nu tavuto..
A ggente s’arrevota.
“Era tantu bbuono,
d’a vita che n’’a avuto?”

“Pecchè ‘sti viecchie genitori
s’affannano e alluccano?
Che tenene int’ ò core
ca pace mò nun trovano?

“Dint’ a chella cascia staggiunata
ce sta ‘nu povero figliulo sfurtunato.
Felicità nun ha truvate maje,
‘na ciorta nera; nera assaje.

Pe’ dint’ à chelli lacreme lucente
tu può vedè che cose storte
ha pruvato chesta anema ‘nnucente
primma e saglì nnanze a chesta porta.

E accussì pure io chiagnette,
vedenno dint’a chill’uocchie appannate
scene ‘e nu film ca fernesce e ricomincia,
ma cu ‘nu finale ca è sempe tal’è quale.

Corse e rincorse, carute sott’a ‘nu traguardo.
Lodi e parole ca ‘o viento porta fino ‘a ‘o sole.
E salute ca nun l’aiuta maje,
fino a quanno po se rassegnaje.

“Sì, ma pecchè,papà, mammà se n’anno tanto
a core?”
“Pecchè dint’a sta bbara a lutto
ce stanno ‘e spoglie toje”.


“Ma allora io so muorto?”
Dicenne sti pparole dispiaciuto,
me mette e mmane nfaccia e nun ‘a trovo,
me guardo dint’all’acqua e nun me veco

e a morta s’alluntana e me chiamma a fa ‘a sagliuta.

Cammino mmiezo a gente che se danna
pecchè a muntagna è tosta e a strada porta affanno.

“Pecchè pure ‘stu sacrificio a me m’è capitato
si d’a vita nun aggio avuto niente?
“ I ‘a vedè cose d’’o ppassato
che t’hanno fatto addivintà nu rassegnato”.

E accussì, passanno mmieze a ciente sguardi
cerco ‘e capì che va truvanno
chi me porta pe’ ‘sti strade.

‘E lato a chesta via impolverata
uocchie janche e cerchiate manteneno,
mustrannele a chi passa,
cornici cu tele che pareno animate. .

Alluntanannemo ‘nu poco
da ‘a mano che me porta,
curiuso appizzo a vista pe’ vedè
‘sta mostra ch’me vò fa sapè.


Guardanno ‘na faccella m’arricordo,
ma è nu ricordo luntano…’na chiagnuta ‘e mamma.
“Cecilia”!! ‘e dint’ ‘o vico “sei”.
Che lacrime affaccianname all’imposta.

‘Nu vascio piccerillo, quatto mura
cu ‘nu lietto. ‘Na criatura janca, ‘na figliola
‘ngenucchiata ca se sbatte ‘mpietto cu dulore.

“E’ stata ‘na brunchita capillara!”
Che pena sta criatura.
Cercanno d’a fa movere cu l’uocchie,
nun ce riesco e me metto ‘na paura.

‘Na paura che scenne dint’ ‘o core
pecchè nun c’è crianza,
nun c’è ragione si a vita te fa fore
a chi appena s’è affacciata all’esistenza.

E po’ ‘sti dduje guagliune chi sò?
Nun è saccio, ma l’aggio visti.
‘O sango a sciumme, ca scenne
a dint’a chill’uocchie ammarrate

…A marcia d’’a pace!! ‘Na frenata,
ddoje vite spezzate. Ddoje mamme
c’aspettano. ‘Nu dulore ca ferma a parata.

Saglienno ancora cchiu ‘ncoppa,
appesantito da ‘sti scene accussì forte,
cerco ‘e sapè pecchè a me m’attocca
‘e vedè a morta d’è muorte.

Ma passannemo annanze
con gesto risoluto, ‘na mossa cu a capa,
ripiglia ‘o cammino:
‘o strazio continua, ‘un è fernuto.

A dint’ a ‘nu quadro cu ‘a cornice dorata
veco ‘na mano massaggià ‘na ferita,
‘sta mano accarezza a parta malata
ma o dulore è ‘o stesso, se ne va n’ata vita

A mano è a mia ‘a riconosco,
‘a ferita è d’’o zio, ma nun ce riesco
a calmà chillu strazio che saglie e me piglia,
m’assale, me svuota, me leva a voglia.

E po’, mentre me ride ‘na perzona amica
e ‘o core è cuntento e ‘sta scena che è doce
‘a capa s’arape e ‘o sango ne scorre.
Me lancio, vulesso cercà ‘e tamponà ‘e ferite,

…ma vengo fermato pecchè nun’è reale.
‘Sti scene sò cose d’’a vita passata,
vederle è sultanto comm’a ‘nu signale.
Cu l’indice aizato ‘a falange m’addita

‘na luce ca arape ‘o spirito e invita
a guarda cierta gente che canta felice:
sereni, distesi, senza patemi.
Che cosa bella, che munno perfetto!

E stessi perzone ‘e dint’e riquadri
ma sane, cuntente, che guardano annanze
‘sta luce che passa p’e cuorpe e dà vita,
‘sti carne sanate ma senza vestite.

E veste nun serveno pe’ farle cuntente
ma ammore ch’è tene p’’a mano attaccate
sotto a ‘nu sguardo paterno ‘e carnale
ca nun songo degno ‘e puterlo affruntare.

“Nun putevo vedè direttamente stu lato?
So stato pruvato aggio avuto paura”.
“Durante a sagliute ca tu é affruntata
si stato tentato ‘e fermà st’avventura,

ma Chi conta te tene talmente a ccore
ca te vuleva fa capì addò stive sbaglianno.
Tenive paura guardanno chi more
c’a ‘vuluntà ‘e campà te steve mancanno.

Ma ‘a logica d’’a vita è ‘a vita stessa.
A’ morte, comm’’a malatia
sò prove c’alluntanà, si se putesse,
facesseno d’’a vita ‘n apatia.

E tu ca è cammenato sempe cu paura,
appujato ogne ghiuorno a quacche muro,
aiza ‘a cape, saglie, affrunte st’avventura:
a morte è l’unica certezza; l’urdemo futuro.