Ah’! Stasera…
Che bellu cielo
chino ‘e stelle,
che cuntentezza
int’ ‘a stu core!
E chella luna janca
ca sta ascenno,
int’ ‘a ‘n’azzurro
che va a notte,
me fa sunnà’
suonni sunnati,
me regne ‘o core
d’aria fresca.
Po’…
illuminato a festa…
passa ‘n’aereo
int’ ‘a stu cielo.
Che cuntrasto,
che stunatura!
Ma no… che dico…
‘Nu brivido p’ ‘a schiena…
nun è ‘o friddo…
Chistu quadro è ‘na meraviglia,
è l’urdemo piezzo
‘e ‘nu mosaico antico!
E si int’ a chill’aereo
ce stissi tu…
ah’!…
Che cosa bella
che po’ essere ‘a vita!
‘O cielo, ‘a luna, ‘e stelle,
tu cu l’aereo tuio…
E’ chesta ‘a vita mia!
Ma io sto nterra
e tu stai cielo,
int’ ‘a chill’aereo
che è ‘o suonno
d’ ‘a vita toia.
Si io ‘na vota
putesse sta’ cu tte
int’ ‘a chella nuvola ‘e metallo
e vulà’… vulà’… vulà’…
int’ ‘a chillu mantiello blu
puntellato ‘e stelle d’oro,
c’ ‘o sciato tuio
che nun me lasciasse sciato,
ah’…
chill’aereo po’…
putesse pure carè’!