“Papà, ma in questa strada le persone si salutano tutte , si parlano dalle finestre, quando escono dai negozi si fermano a chiaccherare.......”

En sabo de matina son andà cor fante a fae ‘n zieto a Portivène.
L’ea n’a giornà freda de frevào ma l’àia l’ea bèla pulita e l’a mea venù vogia de fae doa fotografie.
A son andà sur lungomae verso a cesa de san Peo, a ne gh’ea tanta gente e quei poghi i eo tuti imbacucà.
A me son fermà un po a remiae i gabian chi ziavo ‘nter pezo de mae de fronte aa Parmàia.
La ghe n’ea un fermo n’te no scogeto chi ne miava da nesuna parte.
Sorve e barche lì n’ta passeggiata la gh’ea cen de gati che in copia doi per barca i dormivo ar sole come ‘na copieta ‘nnamoà.
Quand’à son anda n’ter carugio per catae ‘r giornale la ghea n’a confusion de gente!
Da la ciassa veniva su anche ‘r prete e a n’a veceta i g’ha ito “è càita l’Angela”.
Aloa la veceta che la veniva de fae a spesa e a s’è trascinava adosso doa borse cene de roba , a tuti queli che la incontreva, anche a quei afàcia ae fenestre e a e porte di negossi, anche a chi n’e gh’e chiedeva niente la diseva “è caita l’Angela, l’è andà su er parco e l’ambulanza, poveeta!”
I m’ha fato pensae ‘r fante quand’i m’ha ito “papà ma quella donna da le notizie a tutti , proprio come il giornale.”
Aloa o remià ben quela doneta mentre a dava a notisia ai pensionà fermi davanti all’ostaìa e tuti ai ciameva per nome anche i fanti chi passavo ciù’nla; a n’ho podù fae a meno de pensàe che quando in un paese a sùceda quarcò la g’h’è ancoa chi lo và a die e i trova ancoa chi gh’a tempo de starlo a sentie.