primmavera

aspettanno ca se faceva juorno,
'na sera aggio cuntate 'e stelle
pe vede' arrivà 'e primme rondinelle.

nunn''è manco spuntato 'o sole
a luntano ncielo
aggio visto niro 'nu puntillo
gruosso quant''a capocchia 'e 'nu spillo.

e' arrivata 'a primmavera.
'O puntillo niro è addiventato 'n'auciello
ca gira sott''o curnicione d''o balcone
p''a casa soja accumincià 'a costruzione.

nu' tutte sanno ca chella rondinella
è 'nu bellu masculillo ca cu ll'aiuto
d''a cumpagna c'arriva aroppo quacche ora
songhe 'o specchietto d''a criazione.

estate

me guardo chillu nido...
ca guaje a chi m''o tocca...
ca nnammurate ddoje criature
hanno fatto cu tanta cura.

ogni tanto muglierema s'arraggia
pecchè a nu puntillo d''o nido
esce 'nu culillo ca mbratta 'o balcone,
ma io pacenziuso nce pulizzo c''o spazzulone.

autunno

addevento triste e penzeriuso,
quanno me affaccio 'o balcone
e veco pulito 'o pavimento
e attuorno 'o nido nun veco movimento.

se ne so' ghiute 'e rondinelle
so' scumparse pure 'e figlie.
pe' terre luntane so' partute
'nu piezze 'e core cu lloro se ne ghiuto.

vierno

cu è ll'acreme int''a ll'uocchie,
nzerro 'o balcone e me ne traso dinto.
tengo 'na paura: ca è arrivato vierno
e pure io facci''o viaggio ma senza ritorno.

distratto 'a nu fracasso 'e vucelle,
c'arriva 'a sotto 'o purtone
m'accorgo c''a primmavera inaspettata
primma d''o tiempo è arrivata.

'E vucelle songhe chelle d''e niputelle
'e figlie d''o figlio mio dduje angiulille,
ca 'a quanno so' nate
quanta gioia me hanno purtato.

me raccumanno nun me chiagnite
quanno parto pe' chillu viaggio...
io ringrazio cu tutt''o coro 'o Criatore
ca fatto nascere e vede' chelli criature.