'O dottore pazziava c''a infermiera...
' O cane se lamentava 'int''o giardino,
'o mariuolo se preparava 'a fatica d''a sera,
chi 'int''a cantina se veveva 'o vino.

A' 'ntrasatta, senza te presentà, sei arrivato,
'na saietta 'ncielo, 'na grossa trunata,
'a sotto 'ncì haje scutuliato.
Nisciuno chello ca succedeva ha azzeccato.

Sta pe' cadè 'o palazzo?
E' scoppiata 'na mbomma? E' 'n'attentato?
'Nu viecchio cu' 'na faccia 'e 'nu pupazzo
cu'' nu filo 'e voce: < E' terremoto!>

'Nu fuj-fuj generale...
Chi verso 'a casa, chi verso 'e chiazze,
chi cadeva p''e scale
pareveno tutte quante pazze.

Chi è muorto p''a paura
chi pe' gghi 'e pressa e chi pe' nu' fuje.
So' mmurte viecchie,femmene e criature,
avite fatto tutto Vuje.

'Nmiezo 'a piazza 'int''a ttanta ammuina
< E' vist''o bbarone? >
< Me pare che steve vicino a Nannina!>
< Ringrazzianno Dio...Stammo tutte bbuone! >

'Nu criaturo chiagne miezzo a' ggente,
'na signora s'abbraccia 'st'angiulillo...
< A chi è figlio? Chi 'o canosce 'nu parente? >
Senza sapè ca nun tene cchiù nisciuno 'o piccerillo.

Chi scava pe' truvà 'nu parente.
Chi se guarda comm'a 'n'allocco attuorno.
Chi nun tene 'a forza 'e fa cchiù niente.
Chi pare ca se sceta 'a 'nu suonno.

Vicino a 'nu falò...'na cinquantina 'e persone...
'Nmiezo a lloro 'na signora cummann''o rusario
cu' na voce 'e 'nu guaglione.
Pregano a Santu Middio e pure a San Nazario.

Si fosse 'o Pataterno o uno dei suoje adurate
mannerei uno dei suoje viate
e 'nce facesse dicere: < Ascordate,
sulo mo' 'e me v'arricurdate?

Quanno d''a paura 'e ccosce ve tremmano?
I' 'o terremoto v'aggio mannato
pe' ve fa capì chianu - chiano
ca site tutte in peccato! >

Quaccuno a cchesti parole 'nce priasse 'o core
pensanno ca finalmente abbeniva
chello c'avevano prummiso 'e scritture:
'a fine d''o munno ca s'aspettava...

Ma no! 'O Pataterno nunn'è accussi cattivo,
nun tratta a chistu modo 'e figlie.
Isso fa 'o viecchio, 'o distratto e 'o tardivo,
o' puo mettere 'ncroce ma 'sti decisione nunn''e ppiglia.

Chesta è figlia d''a natura, è opera senza tenerezza...
Robba 'e uno ca nun acconosce ll'ammore,
figlia 'e uno ca nun porta priezza.
Si terremoto e 'nci haje spezzato 'o core!

Tu 'nce vulive 'mparà a' essere cchiù bbuone?
'E nun fa 'nfamità 'ncopp''a cchesta terra?
Nun 'nce faje niente carissimo amicone,
nuje nun cagnamme pe' 'nu terremoto o 'na guerra.

Viene cu' mme se tien''o core 'mpietto.
Llà abbascio 'int''o vallone, 'nc'è 'nu quadrillo
d''o juorno apprièsso ca 'nci haje fatto 'o dispetto,
accussì capisce quanto sei piccerillo.

Abbecino a chillu palazzo, 'na signora
pe' recuperà 'a salma d'''a figlia,
assiste 'e scave 'a vintiquatt'ore ,
che ffaje? Chiagne? Che te piaglia?

Guarda llà, all'atu puntone d''o palazzo,
a chill'ommo putente,
nun vide ca stà comm''o pazzo?
Sott''o chelli prete nun tene 'nu parente,

tene e sorde 'mmiezo ' e fetere
'int''a 'nu tiretto
p''a paura d''e perdere
'nce sbatte 'o core 'mpietto.

Sei cuntento? Nun sei servuto a nniente!'
Carissimo e amatissimo signore,
d''a paura 'nci haje fatto sbattere sulo 'e diente
e a' fine 'nci haje spezzato sulo 'o core.