Tutte avimmo paura d''a 'ncuntrà,
ma nun è tanta brutta v''o pozzo assicurà.
Si po' buono 'nce penzasse
ca nun è a fine d''a vita ...T'addunasse.

Tutte quante nuje, quanno avimmo criato,
'nat'a vota simmo nate.
Quanno l'aggio 'ncuntrata
nun era comme 'nce ll'avevano raccuntata.,.

Alluggiavo 'int''a 'na casarella
luntano d''a casa mia, 'ncopp' all'Arenella.
I' nun m''a fosse maje aspettata,
chella senza avvisà s'è presentata.

Purtava 'nu vestito janco,
cu 'na rosa 'ncopp''o fianco,
capille nire e uocchie scure,
era overamente, 'na bella criatura.

Era a mamma 'e tutte quante,
v''o pozzo assicurà, ch'era bella overamente.
Senza nisciuna età, cunoscere nunn'a putive,
ma chella ggià te sapeva.

'E 'nce cercà 'na grazia 'nce pensaje,
a muglierema e 'e figlie mieje,
si essa me puteva aiutà,
pe' ll'ultima vota de ji 'a salutà.

Ma chille uocchie nire,
me capettero 'int''o penziero...
< Pecchè t'aggi''a cuffià?
Ma che 'nce vaje a ffà?

Si 'e figlie haje vulute bbene,
pecchè t''e vvuo' 'ntrattene
che 'nce puo' raccuntà
quanno 'e vvaje a salutà?

E a chella femmna d'oro,
ca è stata sempe 'nu tesoro
che haje sempe maltrattato...
'Nce vuo' fa 'a solita cantata?

Che 'nce puo' dicere ca si pentuto?
Cu' ll'ultimo saluto?
Chello ca nun haje fatto o capito
'int''a tutt''a vita?>

A chistu punto 'e bonora
pigliaje 'a mano d''a signora
e a cuccà me jette
senza dicere niente int''o lietto.