belzebu'

'O cielo se 'ntruvuliava e scuro addiventava, (1)
'o tiempo passava...E 'o cielo cchiù se 'nzerrava. (2)
'Nu viento forte-forte,
chiejava ll'alvere e sbatteva 'e pporte. (3)

int''a tanta rummore e cunfusione
sentette 'na voce 'a luntano...
< Guagliò ! E' vvenuta ll'ora ca senza fa' 'o gradasso,
tu te 'mpare a Satanasso.> (4)

propeto a mme tuccava 'stu turmiento? (5)
senza tenè 'a forza 'e fa cchiu niente,
rimanette senza sciato, ammutulito (6)
comme si fosse scemunito.

fosse stato 'mmitato (7)
a vedè tutt''o riesto d''o criato,
ll'avesse perzino appruvato.
ma a vedè Belzebù chi ll'avesse accettato?

ma comme, cu' tanta ggente 'ncopp''a chesta terra
propeto i' avev''a fa' 'sta quaterna?
Ncuntrà a cchiù brutta d''e criature,
'o munno pe' mme se facette scuro-scuro.

'O viento 'n'uragano addiventaje
e d''o lietto me vuttaje.
' Nu mazzo 'e chiave mmano me mettette
e 'int''a 'nu ruceliello i' fernette. (8)

sentenneme 'mbriaco senza vevere vino,
me truvaje carriato abbascio a 'na cantina (9)
senta putè fa niente.
madonna si ce penzo che turmiento.

nu lampo 'nzisto, ca pareva 'a luce 'e 'nu lampione, (10)
me facette vedè assettato vicino a 'nu spurtone, (11)
'nu viecchio stanco e strutto
ca me pareva ca stesse a lutto.

'A luce d''o lampo nun se stutava, (12)
e chillu viecchio nun se friccecava. (13)
i' chino e paura 'o smicciavo, (14) (15)
mente 'o sciato me s'affannava. (16)

chello ca mme meravigliava
ca 'stu viecchio nun purtava
né catene o' pere e né 'mmano,
mme guardava 'a capo o' pere chianu-chiano.

nè 'e pece e manco 'e zurfo puzzava, (17)
e quanno cchiù 'o guardavo cchiù m'addunavo,
ca nun era ne russo comm'a 'nu mellone, (18)
e manco niro comm'a 'nu cravone. (19)

quanno aizaje 'a capa 'e stucco i' rimanette, (20) (21)
e subbeto me accurgette,
ca manco 'nce spuntavano 'e ccorna 'nfronte.
forse sgarravo su chillo ca tenevo difronte? (22)

chi sei? > Le addumannaje giacomo giacomo, (22a)
e o viecchio tomo tomo, (23)
cu'nu filo 'e voce...Nu chella 'e 'nu contrabbasso,
me rispunnette: < So' Satanasso! >

io quasi nun credevo
a chello ca vedevo e sentevo.
pensaje ca fa fesso me voleva,
cu' chello ca mme diceva.

ma appena 'o Rre de' passaguai,
capette chello ca pensaje:
< Ma tu cride overamente
a chello c'hanno ditt''e me tutt''a ggente?

ca i' primma te tento
pe' po' darte e turmiente?
quanno t'aggio purtato a' puorto
aroppo ca si murto?

aropp''a morte nun 'nce stà
cchiù niente, essa nun esiste,
è stata 'n'invenzione
e chillo ca nun ha capito 'a criazione.

'A vita e 'a morte nun se fermano maje,
so' 'a stessa cosa, portano sulo guaje.
e' 'nu ciclo c'attocca a tutt''e ddoje 'e cumpagne,
ca nisciun''o po' cagnà.

i' nun so' 'nu Santo ,
so' 'nu povero viecchio afflitto e stanco,
ca so' stato mannato, pe' cuntraddì 'o Pataterno,
'ncopp''a chesta terra 'int''a 'st'inferno

po' nunn'è overo
ca essere comme a Isso i' vulevo,
ca ggià 'a quanno è nato
nun vuleva essere 'a nisciuno cuntrariato.

i' 'nci 'o dicette tomo-tomo
ca nun avev''a crià ll'ommo,
ca Isso era viccchiariello
e faceva 'nu maciello.

ma Isso se 'ncazzaje (24)
e d''o cielo me cacciaje,
pe' 'nce da' chistu cunziglio terra terra,
me vuttaje cca 'nterra.

mo so' viecchio
e so' sulo 'nu cupierchio.
e comme so' nato
aggia lassà 'o posto a 'n'ato.

pure Isso già era...Passato
quanno i' so' nnato.
'Nci''o trovo cu chisti cuntrattiempe
all'atu munno aroppo tantu tiempo?

pure Isso ha criato
e 'a vita ha levato,
si so' a stessa cosa 'a vita e 'a morte;
pure Isso se ne gghiuto senza sciorta.> (25)

1-'ntruvulava (diventava nuvoloso). 2-'nzerrava (chiudeva) 3-chiejava (piegava) 4-'mpare (conosca) 5-turmiento (tormento, cosa brutta) 6-sciato ( respiro) 7-'mvitato (invitato) 8-ruceliello (tromba d'aria) 9-carriato (portato) 10- 'nzisto (forte) 11-spurtone (grossa casta di paglia) 12- stutava (spegneva) 13-friccecava (muoveva) 14- chino (pieno) 15-smicciavo (uardavo) 16-sciato (respiro) 17-manco (nemmeno)18-mellone (anguria , a Napoli così la chiamiamo) 19-cravone (carbone) 20- aizaje ( alzò) 21- rimanette 8rimasi) 22- sgarravo (sbagliavo) 22a- giacomo,iacomo ( tremante) 23-tomo,tomo (calmo, calmo) 24 'ncazzaje (si innervosì) 25-gghiuto ( andato in senso di morto)