'A cosa ca cchiù te pare facile è sempe 'a cchiù difficile. Pecchè propeto a mme tuccava 'e scrivere 'a biografia 'e 'stu pueta?
po' nunn' aggio capito 'n'ata cosa: tutte quante 'a biografia 'a metteno o 'int''a chiejatura d''a primma o 'e ll'urdema paggena d''o libbro, mentre Romeo ll'ha vvuluta mettere aroppo 'a presentazione. I' 'nce l'aggio ditto ca steve sbaglianno 'o posto, ma chillo tene 'a capa tosta e mm'ha rispuosto: ca isso 'o puoco ll'accide p''a coda e i' nun 'nci aggio potuto fa' niente.
ma chi è Romeo Raviello? 'A ro' nne vene? 'O nomme ca porta vo' dicere “ pellegrino “ e cca, si nun me stongo accorto, me fa fa' propeto a figura d''o pellegrino.
romeo nasce a Battipaglia il ventidue Novembre del 1947, da Pasquale e D'Onofrio Italia. Decimo 'e dudece figli...Avite letto propeto bbuono, a mamma facette dudece figlie.
avit''a sape' ca Romeo nascette subbeto aroppo 'a guerra. Primma c''a perdessemo,
mussolini aveva prummiso assaje sorde pe' ogni criaturo ca uno metteva 'o munno.
'O pate, ca teneva 'o pallino 'e fa' l'affare, facette fa' 'a mugliera 'na sfurnata 'e criature.
ma p''o fatto c''a guerra 'a perdettemo, mamma Italia e papà Pasquale, nun avettero manco 'na lira. Accussì 'o povero Pasqualino. Se truvaje senza manco 'nu sordo e cu' dudece figlie 'ncopp''e spalle.
ma mo' vene 'o bello: chiste songo 'e nomme d''e criature nate: Primo e Secondo, Cosimo e Damiano, aroppo 'e genitori pigliajne 'nu poco sciato e facettero a Giovanni, Teresa e Rita. Aroppo accuminciajne n'ata vota 'a tarantella e nascettero Bianca e Bruno, Romeo e Giulietta e infine Carmelina.
pecchè nun facettero cchiù figli? 'A mamma puverella s'era fatta vicchiarella e nun né putette ave' cchiù.
'E genitori erano puete d''a vita e 'mmiezo a tanti figli 'ev''a nascere pe' forza 'n'atu pueta...Romeo.
romeo teneva dduje anne, quando a Battipaglia se fermaje 'nu circo, 'o patròne, ca nun teneva figlie, s''o vuleva accattà pe' dduje meliune, a dduje anni Romeo ggià puteva addiventà 'n'artista.
m''a mamma . comm'a 'na scioccola 'e vuleva tene' sempe sott''a essa tutt''e figli, accussì nun se ne facette niente.
era 'o tiempo ca e maccarune se cuntaveno 'int''o piatto.
era 'o tiempo quanno 'nce steveno, ca 'e patane fritte erano 'o meglio sicondo piatto.
era 'o tiempo c''a carne se vedeva c''o cannocchiale sulo 'a Dummeneca 'int''o ragù.
era 'o tiempo ca 'na gallina se magnava sulo a Pasqua, si t''a purtava quacche parente campagnuolo.
era 'o tiempo ca nun se fumava 'nnanze 'o pate fino a vint'anne.
era 'o tiempo ca 'nu guaglione s'avev''a i' a cuccà subbeto adoppo 'o “Carosello”, quanno arrivaje 'a televisione.
era 'o tiempo ca se mureva cu' 'na cacarella.
era 'o tiempo ca tutto se curava cu' 'na pumpetella.
era 'o tiempo ca 'o comunista, aroppo muorto, nun puteva essere purtato 'int''a chiesa.
era 'o tiempo ca cummannaveno e prievete.
era 'o tiempo ca se jeva 'ngalera p''o furto e dduje purtualle.
era 'o tiempo ca 'mmiezo a' via 'nce steveno sulo 'e frate mieje e 'e cavalle.
era 'o tiempo ca putive lascià 'a porta d''a casa aperta ca nisciuno t'arrubbava niente.
( Chesto forse pecchè sapeveno ca nun ce truvaveno niente.)
era 'o tiempo d''o pane cuotto.
era 'o tiempo d''o pane e zucchero.
era 'o tiempo d''o pane e uoglio.
era 'o tiempo d''o pane e cunserva.
era 'o tiempo ca se veveva l'acqua d''o sciummo.
era 'o tiempo ca se pescava 'int''o sciummo.
era 'o tiempo ca 'e criature nun cresceveno, nun pe' malignità, ma pecchè scarziàva 'o magnà.
erano 'e tiempe ca pure se erano 'na chiaveca , Romeo nunn''e cagnasse cu' chille 'e mo'.
'O pate era ll'unico ca faticava. Facette tanti mestiere...'O scarparo, 'o barbiere, 'o rilugiaro, campava tanti figli onestamente.
pure Romeo 'int''a vita ha fatto a fà tanti ccose. Levigatore, operaio conserviero,ragioniere, commediografo, antiquario, organizzatore di fiere e mercatini...'A capa 'a tene grossa...Si fosse nato in alda Italia oggi sarrià certamente 'na celebrità.
mo' pe' cumpletà ll'opera s' è mmiso a fa' pure 'o pueta e 'o scrittore...Viato a isso...
romeo alloggia a Bellizzi 'a trentanni, s''è spusato cu Maria Pia Ricciardi e tene tre figlie: Prisco, Bruno e Cosimo.
romeo oggi tene settantatre anni e 'a saluta a tene quasi bbona: è miezo cecato, nun ce sente tanto bbuono, tene a brunchita croneca, 'nu poco e prostata 'ngrussata, 'a buono ragioniere, quacche calcolo 'e rine, nu' pucurillo-pucurillo 'e artereosclorosi galoppante, quacche reumatismo...Me fermo ccà! ll'unica cosa ca nun tene, anzi ca nun piglia e 'a penzione 'e invalidità...Chesto veramente me meraviglia, a piglieno tutti quanti...Sulo isso no! Chisto è n'atu 'mbruoglio!
me pare c'aggio ditto tutte cose...'Na cosa m''a stevo scurdanno...Nell'anno 2007 d.c.
si presentò alle elezioni comunali o' comune 'e Battipaglia. Pigliaje 42 voti 'ncopp''a trentacinquemila votanti. Isse dice ca 'a media fù bbona, anzi nun se aspettava ca 'mmiezo a tanta ggente 'nce fossero stati 42 fessi ca ll'avessero vutato.'A sera quanno sapette 'e risultate, me ricordo, che gli domandai comm'erano jute 'e vutazione, i' 'a risposta che mi dette nun ll'aggia capita ancora... Me dicette:< 'Nce so' stati 42 fessi ca m'hanno vutato e 'nce so stati trentaquattromilanovecentocinquantotto battipagliesi comme a tte che nun me hanno vutato! Che vuleva dicere?

'O ciuccio è Romeo