Chella matina p''o friddo
pure San Francisco steva dinto.
Quanno sentette 'na voce avveluta,
ca senza speranza, cercava aiuto.

San Franciso 'a porta arapette
e 'ncopp''a 'nu muntone che vedette? (1)
Ca s'era annascunnuto 'nu capretto, (2)
ca p''a paura 'nce sbatteva 'o core 'mpietto.

'A sotto 'nu lupo senza sentemiento,
cu' 'e diente 'a fora, aspettava 'o mumento
d''o povero animale 'e s''o magnà.
'O capretto chiagneva chè nun sa puteva svignà.

- Dicette o' lupo San Francisco-
< Mille vote t'aggio ditto e nun tenè a capa fresca,
E 'e lascià campà 'o capretto
o 'o Pataterno nun te dà arricietto.> (3)

'O lupo c''a cora 'mmiezo 'e ccosce,
lassaje 'a posta muscio- muscio. (4)
San Francisco pigliaje 'o capretto
e 'o cunsegnaje a' patrona cu' affetto.

'A campagnola ringraziaje 'o Santo (5)
e p''o paese ne facette vanto.
'O capretto 'o sarvaje 'a sciorta,
e 'o fatto fu raccuntato 'a porta a porta.

'O juorno appriesso, sempe a' stessa ora,
San Francisco guvernava e puorce 'a mez'ora, (6)
quanno sentette tre bbotte 'e 'nu fucile
c''o facettero asci a 'ntrasatta 'a 'int''o purcile. (7)

Guardaje fore e che vedette?
'mmiezo 'a chiazza 'a capasotta (8)
cu' 'a lengua 'a fora e ll'uocchie stuorte,
appiso a 'nalbero 'o lupo muorto.

'A ggente anurava 'o cacciatore (9)
c'aveva liberato 'o paese d''o terrore.
Ll'ommo tutto tuosto teneva mente (10)
'a rrobba ca ll'arrialava 'a ggente.

San Francisco s'accustaje o' lupo
e lle dicette cupo - cupo:
< Sei turnato ccà? Haje tenuto 'a capa tosta?
E chille t'hanno fatto 'a festa.>

A chistu punto San Francisco sentette 'nu fracasso
e s'avvicinaje passo-passo
o' puntone d''a piazza, add''a ggente (11)
faceva festa cu' vvino e cante.

'O povero Santo cagnaje culore
e 'mpietto se sentette 'nu dulore,
quanno vedette ca 'ncopp''a vrasa abbrustuluto. (12)
muort''o crapetto era fernuto.

Chist''e ll'ommo pensaje San Francisco,
Si fosse pe' isso stisse propeto frisco,
accide pe' te salvà 'o piello
e po' t'arroste 'ncopp' 'a cravunella. (13)

note:
1- 'ncopp''a 'nu muntone ( sopra un accumulo di terra)
2- annascunnuto (nascosto)
3- arrecietto (pace o tranquillità)
4- muscio, muscio (con tristezza o con dispiacere)
5- campagnola (contadina)
6- guvernava (dava da mangiare)
7- 'ntrasatta ( immediatamente o subito)
8- capa sotta (testa in giù)
9- anurava (onorava o faceva onore)
10- tuosto ( orgoglioso o pieno di orgoglio)
11- 'o puntone (all'angolo)
12- abbrustuluto ( cotto )
13- cravunella ( carbonella, materiale residuo dal fuoco di piccoli ramoscelli di leg no)