A napule 'o facchino chella matina
chiammaje 'o vicino e lle dicette: che 'o becchino
aveva seppelli a Antonio 'o ciabbattino,
e che o' campusanto cu' chillo musso 'e puorco (1-2)
'nce 'o aveva purtà 'o schiattamuorto.

'O venditore 'e canzone
'o dicette o' pusteggiatore
ca era avvisà 'o cameriere
ca 'o dicesse subbeto o' barbiere.

Quanno 'o sapette l'acquaiola,
avvisaje 'a spigajola 'a cuggina d''a mariola.
Senza esitazione 'a voce arrivaje a' mammana,
ch'era amica d''o scrivano.

Chiste subbeto, passaje 'a voce all'urtulano,
che 'o dicette pure o' cantenaro,
'o frate d''o macellaro
'o cugino d''o 'mbrellaro.

Chist'ultimo, moggio-moggio
'o dicette a' 'mpaglia seggia.
'A puverella cu' 'e mmane 'int''e capille
passaje 'a notizia o' affila curtielle.

'O puveriello, lassaje l'attrezzatura
e d''o dispiacere faceva capa e mmuro.
'A chelli parte passaje 'nu mariuolo, senza fa' furte,
avvisaje 'o venditore 'e brore 'e purpe.

Chistu pover'omme, 'a notizia passaje o' fiammiferajo
e praticamente 'o sapettero 'o steccadentaro e l'ostricaro,
pe' jonta 'e ruotolo 'o sapette 'o castagnaro (3)
ca cu' tutto rispetto avvisaje 'o stagnaro.

A Napule quanno s'hanno chesti notizie scoppia 'a rivoluzione,
ognuno subbeto è pronto a ffa' 'na bbon'azione.
Chi accatta 'e sciure, chi fa 'na culletta,
p''a da' e' ffiglie e 'a mugliera ch'è Cuncetta.

'O funerale, blocca tutt''e ccose,
Chillu juorno nisciuno fatica e porta 'e rrose.
Nun se mangia pe' tre juorne,
d'ascì ognuno se mette scuorno.

Quanno a Milano succede 'a stessa cosa...
Nisciuno 'o ssape, 'o povero muorto, senza niente,
vene pigliato e senza 'nu parente,
vene purtato o' campusanto.

note:
1-campusanto (cimitero)
2-musso 'e puoco ( muso di maiale o faccia da maiale)
3-pe' jonta 'e ruotolo ( in fine o per completare 'opera)