chistu paese mio ‘mmiez’’e mmuntagne
cu’’a piazza, na chiesiella, pochi ccase,
‘o tiempo passa e isso nun se cagna
e canta quanno ‘a primmavera trase.

a Natale ‘mparanza ‘mprucessione
pe’ rispettà n’ausanza ‘e festa antica,
a’ messa ognuno se fa ‘a cummunione
senza maje lamentarse p’’a fatica.

a Ppasca se fa ‘a scena d’’o calvario
c’’o Cristo ‘e turno che trascina ‘a Croce
e quanno arriva ‘ncopp’’o santuario
‘e vase d’’e pariente comm’è doce.

chistu paese mio ‘mmiez’’e mmuntagne
profuma ‘e pane cuotto cu’’e ffascine
supporta ‘a sufferenza e nun se lagna
forze pecchè là ‘ncoppa Dio è vicino.

e quanno Dio è vicino ce sta ‘a pace
ce sta ‘a tranquillità ‘e na vita cuieta
leggia comme po’ essere ‘a vammace
serena pe’ raggiungere na meta.

chistu paese mio ‘mmiez’’e mmuntagne,
che s’annasconne quase dint’’o vverde,
ricco ‘e migliare d’albere ‘e castagne,
stu core mio penzannelo se perde.

luciano somma