Ppi tutta la me’ vita
quannu dintra l’occhi toi
beddi e mistiriusi mi pirdeva
senza cchiù ‘n ciatu ju
taliava e mi sinteva
patruni di lu munnu
e di sangu e d’amuri
lu cori s’incantava.
Comu fogghi d’alivi
ca lu ventu alliscia
quannu scinni lu suli
e stidda ‘ntra li stiddi
s’ammuccia e s’addummisci.
Ppi tutta la me’ vita
vugghiri lu sangu
st’occhi m’hannu fattu
‘mmriachi di ‘n’amuri
c’addivintò carbuni.
Tant’anni t’aspittavu
e ppi grazia di Ddiu
un jornu t’attruvavu
e ppi jocu di lu ‘nfernu
un jornu ti pirdivu.
Vecchiu, scurdatu e sulu
mi va siccannu ‘u cori.
Ma senza lu me’ amuri
senza la me’ puisia
nun c’è cchiù nuddu ora
ca st’occhi senza funnu
ti canta e si ‘nni prìa !

Musica di cielu
pena senza luci
‘ncantati e mistiriusi...
occhi...
c’aviti fattu chiànciri...
chiancìti !