Nun pozzo maje scurdà , 'a litoranea.
quanno jèvemo purtanno 'o cuppulòne.
Pe ce 'nfelà là dinto li cuppiette...
facenno, piglià collera 'e cafune!

Calàvemo 'o cuppulòne sin' 'a 'nterra
redevèmo, 'e nu juoco ca era 'a 'uèrra!
La chiòrma de bardasce nun tremmava,
si coccheduno ajemmè se ribellava!

Tutt'allummata, de Chiaia la riviera,
sfelavano li carre, sunanno pe li vie
purtavano alla gente, cchiù alleria!
'Ncopp' 'o palco cantavano 'e canzone
'o fuoco 'a mmare... era n'emozione!

Cu tromme, sciosciammocche e raganelle
se jeve 'a piedigrotta festa bella!
'E mentre ca la folla cchiù cresceva
'a spica, 'ncopp' 'a vràsa se cuceva!

Na palla 'e segatura cu la molla
tuccava arrèt' e spalle li nennelle
ca ieveno a truvà nammuratielle!
'A festa, era chiena 'e bancarelle
addò accattàvano, pe figlie 'e pazzièlle!

Tram affullate, scugnizze allu staffone,
se jeve a festeggià, Mamma Schiavona!
Passavamo, primma 'e tutto p' 'a chièsiella,
avevamo da' nu vaso... a' Madunnella!

gianfranco brienza la dedica a tutti coloro che sono riusciti a vivere una piedigrotta in napoli