‘O paese ‘e pàteme è nu paese scunusciuto,
quatte case sgarrupate ca se ne cadessene si nun fosseno puntellate. Ognuna ‘e spalle tene l’aja e po’
‘a campagna abbandunata.
Nun ce stà cchiù nisciuno
e ffà rumore ‘o silenzio.
‘Na réfela ‘e viento arape ‘na porta
‘e na cucina nera ‘e fummo
cu nu stipo ‘a muro e nu travo
caduto ‘ncoppo ‘o furno.
Chiudo ll’uocchie: ‘n addore ‘e pane
e ‘na festa m’accumpare ‘mmiez’ ‘o grano.
Fisarmonica, chitarra e tammorre,
se canta e s’abballa, so’tutte contente,
pure ‘a nonna ce ride senza diente.
È ‘na festa antica, mò, a chesti porte aperte
trasene e ghiescene sulo ‘e lacerte.
‘A gente d’’o casale scumparette,
dint’ ‘a città tra casa e puteche se chiudette.
‘Stu paese rummanette senza battito ‘e core
e senza campanaro, pe’ chi aveva signà cchiù ll’ora?
Restaje pe’’n atu ppoco allerta
aspettanno ‘o ritorno ‘e coccheduno,
ma po’ nun ce ‘a facette
e scunzulato se ne cadette.