Dint’ ‘o vico ‘na matina
me scetaje ‘na canzona, (svegliò)
cu ‘na voce argentina
ca pareva ‘e ‘na guagliona.

‘Stu mutivo doce doce
me mettette ‘e buon umore,
e penzaje ca ‘e chella voce
me putevo ‘nnammurà.

M’affacciaje a ‘stu balcone
e vedette ‘e trezze nere (trecce)
d’’e capille d’’a guagliona,
me trasette ‘int ‘e penziere.

‘Na vucchella rosa rosa (boccuccia)
e duje uocchie a carbunella
immagginavo chesti cose
pe’ ‘na voce comm’ a chella…

Se giraje tutt’a ‘nu tratto
cu’ ‘na faccia rattrappita,
‘nu dulore dint’ ‘o pietto:
“Comm’è brutta chesta zita!” (zitella)

Ma che scherzo fa ‘o destino,
chesta racchia ch’è zitella
canta comm’ a ‘nu viulino
‘na canzona: Reginella.

E Rusella d’ ‘a Duchesca,
ch’ è la mia fidanzata,
cu’ ‘a vucchella sempe fresca
tene ‘a voce d’ ‘a dannata. (ha)