v’o ggiuro ‘nnanzo a Ddio so’ cuntènto
‘e chesta vita comme vène, vène.
‘A quanno ca so’ nnato nunn m’allammento
pecchè chi me sta attuorne me vo’ bbene.

haggio cercato sulamente ‘a pàce
e haggio avuto ‘o vero tanto ammore
‘a tutte chesta ggente assaje capace
‘e stà ‘nfezzato ‘nfunno a chisto core.

sarrà bbravura o fòrze sarrà ciorta…
ij vaco ‘a parte ‘e nanze ‘na bellezza
e nunn me ‘mporta se ‘sta strata è corta,
…m’abbasta ca po’ mòr ‘e cuntentezza!