‘O tiempo passa nunn penza a nisciuno;
cagne ogni ccosa senza fa’ rummone
comme ‘a funtana dinte a’ ‘nu ciardino
che a goccia, a goccia te fa ‘o lavarone.

iuorne pe’ ghiuorne ‘o tiempo se cunzuma
ambressa, ambressa senza ‘na ragione…
pur’ ‘a campana ca ‘inte a’Cchiesa sona
a poco, a poco te fa ‘na canzone.

quanno te pienz’ ‘e cummincià ‘o cammino…
si già ‘nu viecchio e ‘o mmeglio l’ he perduto…
passano ll’anne ‘ncoppe a chesta faccia
e sponta ‘n ato surco maje avuto.

‘O tiempo passa e nunn’ t’aspetta maje.
…Passa fujenno e chi ‘a avuto, ‘a avuto.
…Nemmeno ‘o tiempo pe’ penzà ‘o passato…
t’avuote arreto e tutto s’è fernuto!