‘Na varca ‘a miezzo ‘o mare
veco che s’avvicina
e chiano, chiano accosta…
‘e scòglie ‘e Mergellina.

‘Na coppia ‘e furastire
dinte, abbracciate, vanno
e sbalurdite guardano
quanta bellizze stanno…

‘Na canzuncella sèntano,
do chiosco llà vvicino,
e doppe s’alluntanano
verso ‘o Maschio Angioino.

s’ammirano ‘o Vesuvio
tenennese abbracciate
e suspiranno ‘uardano…
‘sta coppia ‘e nnammurate.

sèntano ‘e piscature
cantà: “Oilì, oilà”
e co’ ‘sta serenata
se tornano a vasà.

se sentano ‘e ccanzone:
carmè, Maria Marì
e “priggiuniere” ‘e Napule…
maje cchiù se ne vonn’ ij.

‘A luna s’alluntana
…s’è fatto già matina
ma chiste ancora ggirano
pe’ ccoppe Mergellina.

sarrà ‘st’ addore ‘e mare
che fa scetà l’ammore.
sarranno ‘sti ccanzone
che traseno ‘inte ‘e core…,

ma chi do mare ammira,
‘e notte, ‘sta città,
- ‘na cosa sulo è certa -
nunn ‘a vò maje lassà!