Vàco giranno ‘o munno sotto e ‘ncoppa
e ‘i ‘stu paese sento sempe ‘o mmale!
maje s’è spìso ‘na parola ‘e bbene
appena sento ‘e nnummenà Casale…!

ormaje ccà se porta ‘a nummenata!
ognuno sape sulo ‘o malamente…,
ma ce vulesse dì…: “Uardate bbuono…
che ce truvate tanta bbrava ggente”!

certo sarrà pecchè ‘n tiempe passate
quaccuno ‘e ‘stu paese avrà sbagliato!
ma chi ‘inte ‘a vita nunn’ ‘a maje sbagliato
…sul’isso murarrà senza peccato!

ce hanno tegnuto nire a’ uno a’ uno…
tutt’ ‘e giurnale e televisione!
ce stanno a scarpesà ogne minuto
…parlanno male ‘e nuje senza raggione!

‘E tutte quante fanno una menesta!
ognuno parla tanto pe’ parlà,
ma ‘e chillo che fatica onestamente
…nun sanno quanta ggente ca ce sta!