Me sto affaccianno spisso 'o balcunciello,
appena che ritorno 'a faticà,
pe' tenè mente a chisto 'uagliunciello
che pe' ccà bbascio cerca 'a carità.

È piccerillo, tenarrà diec'anne!
chisà da che paese venarrà?
le veco sempe 'n cuollo 'e stess’ panne!
...Chisà chi tène a' casa pe' magna?

'N coppe 'e spallucce porta 'nu mantiello
pecchè do friddo se vò cummiglià.
…Cu 'e stesse scarpe e 'o stesso cazunciello
è 'na semmana che sta sempe ccà!

pe' terra ce ha piazzato 'nu cappiello
e aspetta speranzuso 'a carità,
mentre annascuso, invece, 'o cacciuttiello
ce piscia 'a dinte e doppe se ne va.

allora 'o fisso e ddico: …No, nun và…!
a chisto munno chi tène 'a bbundanza,
magnanno a sbafo ‘nfino a vummecà,
e chi nun mette niente dinte 'a panza!

'O veco ca se ggira tuorno, tuorno...
allora 'o chiammo e ddico: Viene ‘a ccà!
…Saglie mò 'n coppe nun te piglià scuorno!
…Da ogge in poi, 'a sera, magne ccà!