Ma che de… quanta ggente ce stanno…!
inte a ‘sta cchiesa ma quanta devote…!
ma che de chesta festa che fanno?!
‘Nu paese Marò s’arrevota!

stanno tutte già pronte pe’ ‘a messa.
ogni cosa già sta priparata
…ccà ognuno sta sulo pe’ Essa,
…pe ‘a Maronna rimane ‘ncantato...

sta chi trase purtanne ‘e bandiere
e chi invece se miso a pregà,
e chiagnenne pe’ dinte ‘e preghiere,
all’altere se va addunucchià.

n’haggio visto maje niente…, nun saccio
chesta festa che fanno che de
e’ allora me faccio curaggio
e rimango curiuso a guardà.

nun capisco pecchè tanta ggente!
so’ furastiero e vulesse capì…!
‘Stà Maronna e ‘o vero putente!
…Trovo ‘o posto e m’assetto pur’ij.

a luntano ‘na voce se sente:
we marò tu ‘o vvì ij te ‘o faccio…!
stò ‘ncammino de ccinche ‘a matina,
ma a mammà tu però me salvà!

‘N àto svène, ‘intrasatte, ‘nte a’cchiesa!
nu criaturo, ca striscia pe’ tterra!
quanta pene me fanno ‘sta ggente
che ccà ddente se mette a pregà.

chesti scene me squartano ‘o core!
chisto strazio me lassano ‘o segno…
e chiagnenno perciò me ne vàco
pecchè, cchiù, nun riesco a guardà!