‘Stu suonno s’avvera
no quanno m’addormo
ma se resto scetato
e me faccio ‘o cunfronto
tra presente e passato;
…quanno penzo, ‘inte ‘o lietto,
ma cu ll’uocchie sbarrate
ca me godo ‘sti figlie
e che vèco cuntiente
tutta quanta ‘a famiglia.

‘Stu suonno s’avvera
quanno penzo ‘e nepute
‘e quann’isso me dice:
mò ca stongo cu te
ij me sento felice!
quanno girano e votano
e me cercano sempe
pecchè vonno pazzià
e t’abbracciano forte
pe’me fa’ cunzulà.

quanno penzo a ‘stu suonno
nun me voglio addurmì
pecchè se stongo scetato
ij ‘o vveco cu ll’uocchie
quanta bbene me date!
se invece m’addormo
ij me ‘o ssono sultanto
e maje niente nun vèco
e da vita nun godo
comme faccio scetato.

quanno penzo a ‘stu suonno
‘e ‘sta vita serena
che ‘o Signore m’ha dato
ij nun saccio si dormo
o se stongo scetato;
ma se è tutto nu suonno
e nun fosse riale
chesta vita da mij,
…certamente, inte ‘o suonno,
ij vulesse murì!