Vaseme,
…l’urdema vòta vaseme
però fernisce ‘e chiagnere
fatte curaggio accuostate
e zitto, zitto
vàseme.
te veco, …staje suffrenno
te scennano ‘sti lacrime
pecchè stongo a murì.
te prego però
vàseme
…damme ‘o respiro tuojo
pure se tu ‘o ssaje
ca doppe chisto vàso
ij nun me sceto cchiù.
vàseme
ca ij te giuro,
…crideme
se tu me faje cuntiento
te vengo ‘nzuonno ‘a sera
e senza te scetà
songh’io ca vàso a te!
iammo te prego
vàseme.
…l’urdema vòta
vàseme
che ‘nparaviso ij saglie
co’ chisto vàso tuoje
pure se se nn’anze a Ddio
pur’io so’ peccatore.
se nun te ‘a siente
‘e me vedè suffrì
‘nzerrale ‘stu occhie e vàseme
…me serve ammore, crideme,
chisto calore tuoje.
vaseme
…è pe’ te ‘o fa’ sentì
tutt’ ‘stu bbene mij
che dinte ‘o core ij porto
quanno me vàso a te.
vàseme,
iamme te prego
vàseme,
‘o vvì ca stò murenno,
famme purtà cu me
tutt’ ‘o calore ‘e ‘stu respiro tuojo.