Oci de butin,
sveio, nel letin,
voia de zugar,
de caminar,
con fra le mane, un paneto,
e, su le spale, un zaineto,
ai piè, un par de scarpe, vece e rote,
i zenoci, pieni...de bote,
a l'orizonte, stormi de rondini, che vola basse,
e, done, ai pogioli, che tira dentro le strasse.
in ciel...spianzisi,
che smorza sorisi,
che rinfresca, la sera,
e, che ne fà meter via...la canotiera.
tera,
che calma, ogni guera,
interessi,
tuti stessi,
dove, se divide tuto,
un piato de riso, o, qualche fruto,
par esser felici, basta...un balon,
e, nel vento...un'acquilon,
ancora, sento...
quel momento,
in quela, mè tera,
dove, non vegnea mai...sera,
e, ne la memoria,
resta solo...storia.
che se perde,
nel verde,
de un giardin,
dove zugava...un butin,
in una busa, de giara,
dove, con quatro soldatini, faseino a gara.
quanti giri, in bicicleta,
in quel'angolo, dò che se metea, el moleta,
e, l'inverno, sui banchi de scola,
con i pomerigi, a studiar...sù la tola,
la prima neve, che fiocava,
che, de drìo ai veri...se vardava.
cartoni animati, e caroselo,
che mondo...belo,
altro, non ne interessava,
la cativeria, da là...non la passava,
solo zugar,
e...ciassar,
parchè, non i ne fà governar a noialtri, buteleti,
che savemo, come far, a unir i siori, con...i poareti!