Mille vote me l'aggio addimmannato
già a piccerillo appena spusuliato. (1)
'Nce stà quaccosa dopp''a morte?
Nun aggio avuto maje 'na risposta.

Mo' ca me trovo a 'nu passo
pure i' d''o trapasso
e' è quasi ll'ora 'e 'nzerrà 'o quaderno...(2)

Aggia addimmannà 'na grazia o' Pataterno.
'O saccio ca nun m''a mmereto tanta cumprenzione,
ma nun ma pozzo fa' scappà 'st'occasione,
'Nce l'aggia cercà e nun m'aggi''a mettere scuorno, (3)
pure si nun aggio creduto a Isso ogni juorno.

Si mme fa restà annascunnuto
'mparaviso sulo pe 'nu minuto,
pe' putè vede' chianu-chiano
chell'anema 'e mamma mia pure si 'a luntano.

Po' senza 'nce cercà cchiù niente
sapenno ca cummanna sulo Isso overamente,
senza dicere cchiù niente all'Eterno
me po' mannà pe' sempre 'int''a ll'inferno.

note:
1-Spusuliato ( appena raggiunta l'età della ragione)
2-'Nzerrà ( Chiudere)
3- Scuorno ( vergognarsi