Nisciuno 'o ssape...
Ca pure 'o Patateno è stato piccerillo...
Primma ca nascesse 'o munno o 'n'angiulillo.
Isso pure teneva 'o pate
ca faceva ll'inventore...
Si! propeto isso, 'o pate d''o Criatore.
'O piccerillo d''o pate ne pigliava chianette
quanno vuleva fa l'inventore
senza 'o cunzenzo d''o genitore.
'Na bella matina 'o criature s'accurgette
ca 'o pate scurdariello,
nun aveva d''o labboratorio chiuso 'o canciello.
Trasette e che tenette mente?
Ca 'na palle 'e fuoco ardente,
'o smicciava 'a copp''a furnacella
'a 'int''a 'na caccavella.
'O guaglione cu' chella palla
se vuleva fa' 'na jucatella,
ma quanno 'mmane s''a truvaje
subbeto se scuttaje...
'o piccerillo sanu-sano
s''a facette scappà 'a mano.
A ttiempo nun ll'afferraje...
Jette 'nterra e 'o bing-beng scuppiaje.
'A chella palla 'e fuoco nascettero
comm''a 'nu mistero
'nu cuofeno 'e munne e tante stelle,
ca 'ncielo parevano tanti lamparelle
Ll' opera era accuminciata
e ll'universo fu criato
pe' colpa 'e 'nu piccerillo
e 'nu pate scurdariello.
'O pate, d''a criazione. rimanette abbagliato,
pe' nun essere d''o figlio superato,
pensaje ca nun puteva 'o criato
rummanè senza essere alluggiato.
'Int''o laboratorio currette,
c''a creta 'nu bello pisto facette,
e' ddudece ll'opera era quasi fernuta,
mancava sul''a sciusciata.
Ma haimè, 'o Pataterno spezzaje 'a fatica
pe' se i' a ffà 'na bella magnata,
però esagerò c''o bicchierino...
E facette l'ommo sott''o effetto d''o vino.
- Attualmente 4.4/5 meriti.
4,4/5 meriti (5 voti)