Notte ca è notta nera
notte ca m’è mugliera
zuzzosa e strafuttente
scurnosa ‘e certa gente
ca scorre int’a spaccata
ca ‘nzorfa ‘a quanno è nata.

notte ca è notta janca
notte ca ‘e vote stanca
chiarchiosa e parlettera
schiattosa e ‘ntapechera
ca sfronna fora e dinto
ca tene ‘o pietto strinto.

notte ca è notta santa
notte ca preja e canta
furesta e sempe ‘a stessa
‘ntrezzata e trevellessa
t’a cerco e nun t’a trova
me fa na strata nova.

notte ca è notta annura
notte ca nun te cura
‘nzevata e cecatella
fissata ‘e na nennella
ca ‘o sango volle e squaglia
ma è fuoco senza paglia.

notte ca è notta a lutto
notte ca m’ha distrutto
schifosa e lutammata
ca niente s’è ‘mparata
‘e chesta vita nosta
sfessata e overo tosta.

notte ca è notta guasta
notte ca maje nun basta
t’o giuro e t’o mantengo
io chistu core tengo
e primma ‘e fa sciò sciò
m’o straccio e allucco no!