‘ A lavagna D’’A scola

‘Ncopp’’o banco : l’inchiostro, ‘o pennino,
nu quaderno a quadrette, ‘a cartella,
na guagliona bellella vicino,
piccerella e accussì graziusella.
‘Nfaccia a nuie truneggiava ‘a lavagna
addo’ spisse screvevemo ‘e nomme
cu’ duje core e na freccia sulagna
ca ‘e ‘nfezzava astrignelle, e comme!
ma na mano cchiù grossa veneva
a levà chelli scritte d’ammore
che silenzio antrasatta scenneva
miez’’a nuie, dint’a chilli duie core!
e’ ricordo? No, è storia d’aiere
ca po’ essere pure ‘e dimane
fino a quanno ce stà ‘int’’e penziere
‘o calore e ‘a carezza d’’e mmane.
‘A nennella bellella ogge è nonna
e pur’io ma cu’ n’ata cumpagna
quanta vote però ‘o core sonna
chillu banco, ‘o quaderno, ‘a lavagna.

Luciano Somma